រំឮករឿង Lara Croft: Tomb Raider ដែលហូលីវូដមកផ្តិតយកទិដ្ឋភាពដ៏ស្រស់ត្រកាលនៃទឹកដីអង្គរ កម្ពុជានាឆ្នាំ​ 2001 (មានវីដេអូ)

អ្នកខ្លះប្រហែលជានៅចាំបានថា កាលពីឆ្នាំ 2001 ផលិតកម្មហូលីវូដយក្ស Paramount បានមកថតភាពយន្តមួយនៅក្នុងខេត្តសៀមរាប ប្រទេសកម្ពុជាយើង ដែលមានចំណងជើងថា Lara Croft: Tomb Raider ។ វាជាភាពយន្តមួយដែលទស្សនិកជន លាន់មាត់សសើរមិនដាច់ពីមាត់គ្រប់ៗគ្នា។

ភាពយន្ត Lara Croft: Tomb Raider មួយនេះគឺជាភាពយន្តបែប ផ្សងព្រេង បាញ់បោះ លាយឡំជាមួយនឹងការស្វែងរកវត្ថុបុរាណ រាងត្រីកោណម្យ៉ាង ដែលធ្វើឲ្យសាច់រឿងពិតជាឡូយមែនទែន។ ភាពយន្តមួយនេះគឺជា ស្នាដៃដឹកនាំសម្ដែងរបស់លោក Simon West ហើយបានចំណាយលុយផលិតអស់រហូតទៅដល់ 115 លានដុល្លាឯណោះ ហើយវាក៏មានការចូលរួមសម្តែងពីកំពូលតារាសម្តែងស្រី Angelina Jolie និងលោក Daniel Craig ដែលទស្សនិកជនស្គាល់គាត់ថាជាតួអង្គ 007 James Bond។

លើសពីនេះទៅទៀត Lara Croft: Tomb Raider ក៏បានមកផ្តិតយកទិដ្ឋភាពដ៏ស្រស់ត្រកាលនៅលើទឹកដីសៀមរាបអង្គរ នៃប្រទេសកម្ពុជា ដែលបង្កើតបានជាផ្ទាំងទស្សនីយភាពដ៏អស្ចារ្យថែមមួយកម្រិតទៀត។ ដំណើររឿងគឺនិយាយអំពី ការទៅរកវត្ថុបុរាណត្រីកោណម្យ៉ាងដែលបានបែកចេញជាពីរចំណែក ដោយសារការប្រើប្រាស់មិនបានត្រឹមត្រូវរបស់ក្រុម Illuminati។ លោក Lord Richard Croft ជាឪពុករបស់តួឯកស្រី Lara Croft បានផ្ដាំឲ្យនាងទៅរកបំណែវត្ថុបុរាណត្រីកោណនោះឲ្យបានមុនក្រុម Illuminati ដោយបំណែកទីមួយបានលាក់ទុកនៅក្នុងប្រាសាទបុរាណនៃប្រទេសកម្ពុជា គឺប្រាសាទតាព្រហ្ម និងបំណែកទីពីរត្រូវបានលាក់ទុកនៅក្នុងរូងទឹកកកនៅ Siberia។ រាល់ការធ្វើបេសកកម្មរបស់ Lara ម្តងៗ ពិតជាឡូយមែនទែន ទាំងប្លង់ថត និងបច្ចេកទេសកាត់ត។

បន្ថែមទៅលើនោះទៀតមានឈុតមួយដែល តួអង្គ Lara Croft បានជួបជាមួយនឹងព្រះសង្ឃខ្មែរមួយអង្គដោយនាងនិយាយជាភាសាខ្មែរជាមួយ និងមានឈុតមួយផ្សេងទៀតដែលព្រះសង្ឃខ្មែរបានធ្វើពិធីមួយ លាយឡំជាមួយអភីនិហា ធ្វើឲ្យរបួសលើដៃនាងជាសះស្បើយ ដោយមិនមានសូម្បីតែស្នាម៕

សម្រាប់ទស្សនិកជនដែលបានទស្សនារឿងមួយនេះរួច តើឈុតឆាកមួយណាដែលអ្នកពេញចិត្តខ្លាំងជាងគេ? ហើយចង់ឃើញផលិតកម្មហូលីវូដមកថតភាពយន្តនៅប្រទេសយើង តំបន់ណាទៀតដែរ?