ប្រោនកាហ្វេស្វាគមន៍អតិថិជនជាមួយ​#២០

ប្រោនកាហ្វេ គឺជាហាងកាហ្វេមួយដែលមានការគាំទ្រយ៉ាងខ្លាំងពីសំណាក់មហាជន មិនថាជាជនជាតិខ្មែរឬបរទេសនោះឡើយ ព្រោះតែការផ្តល់ជូនយ៉ាងសម្បូរបែបដែលរួមមានទាំងនំ ម្ហូបអាហារ កាហ្វេឈ្ងុយឆ្ងាញ់ និងការទទួលស្វាគមន៍ប្រកបដោយស្នាមញញឹមពីបុគ្គលិកបម្រើសេវាកម្ម។ អ្នកនឹងប្លែកភ្នែក និងអារម្មណ៍គ្រប់ពេលដែលបានឈានជើងដើរចូលក្នុងហាង ប្រោនកាហ្វេ ព្រោះតែការរចនាម៉ូដស្អាតៗប្លែកៗ ដែលបញ្ជាក់អត្តសញ្ញាណពីភាពខុសប្លែកពីហាងកាហ្វេដទៃ។

ដោយទទួលការគាំទ្រយ៉ាងខ្លាំងពីសំណាក់អតិថិជនជាច្រើន ថ្ងៃនេះ ប្រោនសាខាទី២០ ដែលមានឈ្មោះថា Brown Midtown ដែលមាន ទីតាំងនៅក្នុង Midtown Mall លើកំណាត់ផ្លូវ ២០០៤ កែង 13B បានបើកទ្វារទទួលស្វាគមន៍អ្នកដែលនិយមទទួលទានកាហ្វេ និងភេសជ្ជៈ ព្រមជាមួយនឹងមឺនុយជាច្រើនមុខទៀតជាផ្លូវការហើយ។ ទន្ទឹមនឹងនេះយើងក៏សង្កេតឃើញថាមានការផ្តល់ជូនយ៉ាងពិសេសសម្រាប់អតិថិជនចំនួន៥០នាក់ដំបូង ដោយទទួលបាន KeepCup ម្នាក់មួយ។ តែអ្វីដែលប្លែកខុសពីសព្វមួយដងនោះគឺ មានទាំងការសម្តែងតន្ត្រីប្រភេទ Acoustic នៅឯជាន់ខាងលើ ជាមួយអ្នកចម្រៀងក្មេងៗដែលមានសម្លេងពីរោះនៅក្នុងឱកាស បើកទ្វារទទួលស្វាគមន៍នៃ ប្រោន សាខាថ្មីមួយនេះផងដែរ។

បើនិយាយពីហាង Brown Midtown វិញគឺមានទំហំប្រហាក់ប្រហែលនឹង Brown TK Avenue ដែល តែការរចនាខុសប្លែកពីគ្នា ដោយហាងមួយនេះមាន Counter និងធ្នើដាក់សំភារៈ ដែលសង់ចេញពីឈើកុងផ្លាកេរហូតដល់ទៅ១២០០០ស្រទាប់ អមជាមួយការរចនាពិសេសប្លែក ដែលហាក់បីដូចជាយើងកំពុងស្ថិតនៅក្នុងល្អាងភ្នំ ឬជ្រលងភ្នំមួយដែលមានពន្លឺភ្លឺគួរឲ្យចង់ទស្សនា។

ចាប់តាំងពីថ្ងៃបើកទ្វារដំបូង រហូតមកដល់បច្ចុប្បន្ននេះ យើងឃើញថា ប្រោន នៅតែឈរនៅមុខគេ ក្នុងការផ្តល់ជូននូវរសជាតិដ៏ឈ្ងុយឆ្ងាញ់មិនប្រែប្រួលទឹកដៃ សេវាកម្មរួសរាយរាក់ទាក់ ព្រមជាមួយនឹងការរចនាហាងប្រកបដោយភាពប្រណិត និងច្នៃប្រឌិតខ្ពស់។

ប្រសិនបើថ្ងៃណាមួយ ប្រោន បានឈានជើងចូលទៅក្នុងទីផ្សារប្រទេសដទៃ តើអ្នកនឹងយល់ដូចម្តេចដែរ?