គន្លឹះទាំង១០ ដែលជួយអ្នកចាប់ផ្តើមរត់ដើម្បីសុខភាពពីថ្ងៃនេះ

ក្នុងជីវភាពរស់នៅមនុស្សក្នុងពេលបច្ចុប្បន្នគឺ ពោរពេញទៅដោយភាពមមាញឹក ជាមួយនឹងការងារនៅកន្លែងធ្វើការ ក៏ដូចជាក្រុមគ្រួសារនៅឯផ្ទះ ដែលពេលខ្លះ ភាពមមាញឹកទាំងនោះបង្កើតឲ្យអ្នកមានអារម្មណ៍ធុញថប់ តានតឹង និងស្រ្តេស រហូតមានបុគ្គលមួយចំនួនភ្លេចភ្លាំងអំពីសុខភាពផ្ទាល់ខ្លួនទៀតក៏មាន។

ទោះស្ថិតក្នុងស្ថានភាពរវល់យ៉ាងណាក៏ដោយ ក៏អ្នកគួរបានឈ្លាតពេលខ្លះដើម្បី គិតគូរពីសុខភាពរបស់អ្នកដែរ ដែលងាយបំផុតនោះគឺ ការរត់ ដែលជាលំហាត់ប្រាណដ៏ល្អ និងជាវិធីដ៏អស្ចារ្យក្នុងការកាត់បន្ថយភាពតឹងតែង ហើយក៏ជាកីឡាដែលត្រូវបានអនុវត្តន៍នៅគ្រប់ពេល និងគ្រប់ទីកន្លែងផងដែរ។ លើសពីនេះទៅទៀត អ្នកនឹងមិនយឺតពេលក្នុងការហាត់ប្រាណ ឬមានបញ្ហាក្នុងការស្វែងរកចំណតយានយន្តនៅមជ្ឈមណ្ឌលហាត់ប្រាណនោះទេ។ អ្វីដែលអ្នក ត្រូវ ធ្វើនោះ គឺពាក់ស្បែកជើងកីឡា និងចេញទៅក្រៅជាការស្រេច។

ដូច្នេះ តើអ្នកចាប់ផ្ដើមដោយរបៀបណា? ហើយអ្វីដែលសំខាន់ជាងនេះទៅទៀត តើអ្នកបន្តការរត់ក្នុងរយៈពេលដ៏យូរបានដោយរបៀបណា? យើងបានប្រមូលគន្លឹះមួយចំនួនពីក្រុមអ្នករត់មេនូឡាយហ្វ៍ដែលបានចូលរួមនៅក្នុង កម្មវិធីនានាចាប់ពីការរត់ចម្ងាយ ៥ គីឡូម៉ែត្ររហូតដល់ អត្តពលិកប្រចាំរដូវកាលដែលបាន រត់ម៉ារ៉ាតុង។

1. ចាប់ផ្តើមរត់តិចៗ៖ បង្កើតទម្លាប់នៃការដើរ និងការរត់របស់អ្នកក្នុងរយៈពេល ២០ ទៅ ៣០នាទី ដោយចាប់ផ្ដើមជាមួយនឹងការរត់រយៈពេលពីរនាទី ដើរមួយនាទី និងរត់រយៈពេលពីរនាទីទៀត។ល។ នៅពេលអ្នកស៊ាំជាមួយនឹងវាហើយ អ្នកអាចប្ដូរទៅបីនាទី និងបន្ទាប់មកបួននាទី។

2. ត្រូវទិញស្បែកជើងដែលមានគុណភាពល្អ៖ ការរត់ដោយប្រើស្បែកជើងកីឡាចាស់ៗ ឬស្បែកជើងដែលប្រើសម្រាប់កីឡាផ្សេងអាចបណ្ដាលឱ្យមានគ្រោះថ្នាក់។ ព្យាយាមទិញនៅហាងដែលអ្នកលក់មានចំណេះដឹងអំពីការរត់ និងអាចប៉ាន់ស្មានស្បែកជើងដែលសមនឹងជើងអ្នក។

3. ផ្ដោតលើទម្រង់៖ នៅពេលអ្នកកំពុងរត់ សូមមើលទៅខាងមុខ មិនត្រូវមើលទៅជើងរបស់អ្នកទេ។ កុំចំកោងខ្នង ហើយដាក់ស្មារបស់អ្នកឱ្យបានត្រឹមត្រូវ និងស្មើគ្នា។ ការរត់ដងខ្លួនត្រង់ធ្វើឱ្យដងខ្លួនរបស់អ្នកត្រង់ស្មើ ដែលជួយបង្កើនសមត្ថភាពសួត និងជំហានរបស់អ្នកបានជាអតិបរមា។

4. ចេញទៅខាងក្រៅ៖ ការរត់នៅខាងក្រៅអាចឱ្យអ្នកស្រូបយកខ្យល់បរិសុទ្ធ និងរុករក តំបន់ជិតខាងដែលគួរឱ្យចាប់អារម្មណ៍។

5. ត្រូវមានទំនួលខុសត្រូវ៖ ចាប់ដៃគូជាមួយមិត្តភ័ក្តិ ឬចូលរួមជាមួយក្រុមរត់។ ការស្វែងរកតាមអ៊ីនធឺណិតនឹងអាចឱ្យអ្នកទទួលលទ្ធភាពមួយចំនួន ចាប់ពីសិក្ខាសាលាដែលបានឧបត្ថម្ភដោយហាងលក់ទំនិញរហូតដល់ក្រុមសហគមន៍។

6. កុំរត់រាល់ថ្ងៃ៖ ការរត់បីទៅបួនដងក្នុងមួយសប្ដាហ៍ជាការចាប់ផ្ដើមដ៏ល្អ។ ទុកពេលឱ្យរាងកាយរបស់អ្នកបានសម្រាក ដើម្បីឱ្យវាត្រឡប់មកសភាពដើមវិញនៅចន្លោះការហាត់ប្រាណ។

7. កំណត់កាលវិភាគ ការរត់៖ ប្ដេជ្ញាចិត្តក្នុងការរត់នៅថ្ងៃជាក់លាក់ និងពេលវេលាជាក់លាក់។

8. កំណត់គោលដៅ៖ ការប្រឹងប្រែងក្នុងការសម្រេចអ្វីមួយគឺជាការជំរុញទឹកចិត្តដ៏ខ្លាំងក្លា។ ដូច្នេះ សូមចុះឈ្មោះចូលរួមការប្រកួតប្រជែង ហើយធ្វើការហ្វឹកហាត់សម្រាប់ថ្ងៃសំខាន់។ លើកដំបូងដែលអ្នករត់កាត់ទីផ្ដាច់ព្រ័ត្រ អារម្មណ៍នៃការសម្រេចបានគឺជាការទទួលរង្វាន់ដ៏អស្ចារ្យ។

9. បើកសំឡេងតន្ត្រីឱ្យឮខ្លាំង៖ តន្ត្រីពិរោះៗអាចជួយអ្នកឱ្យចាប់ផ្ដើមការរត់ ហើយវាធ្វើឱ្យការរត់នានាកាន់តែមានភាពរីករាយថែមទៀត។

10. គ្រាន់តែរត់ប៉ុណ្ណោះ៖ តើអ្នកមិនមានអារម្មណ៍ចង់រត់មែនទេ? សូមប្រាប់ខ្លួនឯងថា អ្នកនឹងរត់តែប្រាំនាទីប៉ុណ្ណោះ។ ប្រសិនបើអ្នកនៅតែមានភាពលំបាក បន្ទាប់ពីការរត់រយៈពេលប្រាំនាទីដំបូង អ្នកអាចទៅផ្ទះវិញបាន។ ប៉ុន្តែឱកាសគឺថា នៅពេលដែលអ្នកនៅខាងក្រៅ អ្នកនឹងទទួលបានការលើកទឹកចិត្តឱ្យបន្តការរត់!

អញ្ចឹងចាប់ផ្តើមពីថ្ងៃនេះ ដើម្បីត្រៀមខ្លួន និងចុះឈ្មោះចូលរួមកម្មវិធី Angkor Wat International Half Marathon ជាមួយ Manulife ដែលនឹងប្រព្រឹត្តិទៅនៅក្នុងខេត្តសៀមរាប នា ថ្ងៃទី៨ ខែធ្នូ ឆ្នាំ២០១៩ ខាងមុខនេះ។

អត្ថបទគន្លឹះសម្រាប់សុខភាពនេះ នាំមកជូនដោយ៖ Manulife