មនុស្សម្នាក់ៗតែងតែមានចំណូលចិត្តក្នុងការទស្សនាភាពយន្តផ្សេងៗគ្នា មានអ្នកខ្លះចូលចិត្តភាពយន្តបែបមនោសញ្ចេតនាស្នេហាអូនបង អ្នកខ្លះទៀតចូលចិត្តបែបកំប្លុកកំប្លែង,បាញ់បោះ ឬ ភ័យរន្ធត់ ហើយក៏មានមនុស្សមួយចំនួនទៀតចូលចិត្តភាពយន្តបែបមនោសញ្ចេតនាស្នេហាស្រឡាញ់ភេទដូចគ្នាថែមទៀតផង ។
បើនិយាយដល់ភាពយន្តបែបមនោសញ្ចេតនាស្នេហាស្រឡាញ់ភេទដូចគ្នាគឺនឹកឃើញដល់រឿង Love, Simon ដែលបានចាក់បញ្ចាំងកាលពីថ្ងៃទី 16 ខែមីនាឆ្នាំ 2018 តែម្តង។ វាគឺជាភាពយន្តបែប លាយឡំជាមួយនិងមនោសញ្ចេតនាបែបយុវវ័យរបស់អាមេរិកដែលស្រឡាញ់ភេទដូចគ្នា ។
ដោយឡែកកាលពីថ្មីៗនេះក្រុមហ៊ុន Hulu Premium ដែលជាក្រុមហ៊ុនលក់សិទ្ធិក្នុងការចាក់ផ្សាយភាពយន្តតាមបណ្ដាញអ៊ីនធឺណិត ក៏បានប្រកាសចេញផ្សាយភាពយន្តភាគបែបមនោសញ្ចេតនាស្នេហាស្រឡាញ់ភេទដូចគ្នាមួយដែលមានចំណងជើងថា Love, Victor ដែលត្រៀមដាក់ឲ្យទស្សនាបាននៅក្នុងថ្ងៃទី 19 ខែ មិថុនា ឆ្នាំ 2020 នាពេលខាងមុខនេះ ហើយកាលពីថ្ងៃទី 27 ខែ មេសា ឆ្នាំ 2020 មុននេះ ភាពយន្តភាគ Love, Victor មួយនេះក៏បានបញ្ចេញឈុតគំរូដំបូងរបស់ខ្លួនផងដែរ ។
លើសពីនេះទៅទៀតភាពយន្តភាគ Love, Victor វាក៏នៅក្នុងសែស្រឡាយភាពយន្ត Love, Simon ផងដែរ ហើយ Love, Victor ដំបូងឡើយមានគម្រោងថានឹងត្រូវបានចេញផ្សាយនៅក្នុង Disney+ ប៉ុន្តែក៏បានប្តូរទៅចេញផ្សាយ Hulu Premium វិញដោយសារសំបូរទៅដោយស្រទាប់យុវវ័យ ហើយណាមួយ Disney+ ភាគច្រើនធ្វើតម្រូវចិត្តក្មេងៗ ។
ទស្សនាឈុតគំរូដំបូង Love, Victor ខាងក្រោម៖
