អ្នកដឹកនាំរឿង Guardian of The Galaxy លោក James Gunn បានបង្ហាញពីភាពយន្តដែលគាត់ចូលចិត្តនោះគឺ Spider-Man: Into the Spider-Verse ដែលជាភាពយន្ដ Superhero បែបគំនូរជីវចលទទួលបានការគាំទ្រយ៉ាងពេញទំហឹងកាលពី 2018 កន្លងទៅ ។
លោក James Gunn កំពុងលេង challenge មួយនៅលើបណ្ដាញសង្គម Twitter ក្រោមចំណងជើងថា “30-Day Movie Challenge” រាល់ថ្ងៃគាត់រើសភាពយន្ដមួយដែលលោកចូលចិត្តទៅតាមលក្ខខណ្ឌដែលដាក់ឲ្យជ្រើសរើសប្រចាំថ្ងៃ ។ នៅថ្ងៃទី 10 នេះលក្ខខណ្ឌនោះមានចំណងជើង “Your favorite superhero movie” មានន័យថា “ខ្សែភាពយន្ដ Superhero ដែលអ្នកចូលចិត្ត” ទីបំផុតលោក Gunn បានជ្រើសយក Spider-Man: Into the Spider-Verse ជាភាពយន្ត Superhero ដែលលោកស្រឡាញ់ ។
ហើយអ្នកអាចនឹងឆ្ងល់ថាហេតុអ្វីបានជាលោកមិនជ្រើសភាពយន្ត Superhero របស់លោកដូចជាភាពយន្ត Guardians of The Galaxy ដែលលោកជាអ្នកដឹកនាំផ្ទាល់នោះ ? វាមិនមែនជារឿងគួរភ្ញាក់ផ្អើលទេដែលលោកជ្រើសរើសខ្សែភាពយន្ដ Spider-Verse ដែលយើងភាគច្រើនបានដឹងហើយថាវាជាខ្សែភាពយន្ដដ៍អស្ចារ្យមួយដែលមានមនុស្សជាច្រើនបានចូលចិត្តរហូតដល់គ្រងដំណែងពាន Academy Award for Best Animated Feature Film ប្រចាំឆ្នាំ 2018 ទៀត ។ លោក Gunn និយាយថា គាត់ជ្រើសយកភាពយន្ដដែលមិនមែនជាស្នាដៃរបស់គាត់ ក៍ដោយសារតែគាត់ចង់ស្គាល់ខ្សែភាពយន្ដដែលល្អៗជាច្រើនទៀត ។
ស្របពេលឥឡូវនេះ អ្នកគាំទ្ររបស់ Spider-Man: Into the Spider-Verse និងអ្នកគាំទ្រលោក Gunn ផ្ទាល់កំពុងតែសប្បាយចិត្តនិងអន្ទះសារជាក្រៃលែង ដោយសារតែភាពយន្ដទាំង 2 នេះកំពុងផលិតវគ្គបន្ដដូចគ្នា មានដូចជា Spider-Man: Into the Spider-Verse 2 បច្ចុប្បន្នកំពុងស្ថិតនៅក្នុងដំណាក់កាលផលិតសម្រាប់ការចាក់បញ្ចាំងនៅចុងឆ្នាំ 2022 ។ ដោយឡែកភាពយន្ត Guardians of The Galaxy Vol. 3 ក៍សន្យាថានឹងមកកក្រើករោងភាពយន្តម្ដងទៀត ប៉ុន្ដែមិនទាន់មានកាលបរិច្ឆេទច្បាស់នៅឡើយទេ តែអ្នកគាំទ្ររំពឹងថាវានឹងមកដល់នៅចុងឆ្នាំ 2022 រឺ 2023 ខាងមុខ ។ ក្រៅពីការងារជាមួយ Marvel លោក Gunn ក៍ទើបតែបញ្ចប់ការថត Suicide Squad 2 ជាមួយនឹង DC ហើយគ្រោងនឹងចាក់បញ្ចាំងនៅពាក់កណ្ដាលឆ្នាំ 2021 ក្រោយនេះហើយ ។
តើភាពយន្ត Superhero ណាដែលអ្នកបានទស្សនាហើយនិងពេញចិត្តជាងគេ ?
