••• បើអ្នកជាហ្វេនរបស់ពីភពវេទមន្តរបស់ J.K. Rowling អ្នកនឹងលង់ស្រឡាញ់បណ្តាសៀវភៅប្រឡោមលោកនិងភាពយន្ត HARRY POTTER ដែលចេញមកដល់ពេលនេះបាន៨វគ្គហើយ (មិនរាប់បញ្ចូលសែស្រឡាយ FANTASTIC BEAST) ដោយក្នុងនោះ ក្រៅពីសាច់រឿងល្អមើលជក់ចិត្ត តួសម្តែងល្អឥតខ្ចោះហើយនោះ មន្តស្នេហ៍ម្យ៉ាងនៃភាពយន្តនេះ គឺការសម្រឹតសម្រាំងពាក្យគាថាមន្តអាគមដែលស្តាប់លឺហើយ មិនសរសើរថាឡូយមិនបាននោះឯង។
តោះមករំលឹកឡើងវិញនូវគាថាដែលយើងលួចសូត្រថាទាំងត្រូវផងខុសផង តាំងពីភាគដំបូងមកដល់ភាគចុងក្រោយ ថាមានគាថាអ្វីខ្លះ ដោយប្រភេទនៃគាថានោះត្រូវបានបែងចែកជា៣ក្រុមសំខាន់ៗគឺ មន្តទូទៅ (Charms) អាគមការពារខ្លួន (Defensive Charms & Curses) និង បណ្តាសារមិនអាចលើកលែង (Unforgiveable Curses)៖
WINGARDIUM LEVIOSA
មន្តទូទៅ៖ ប្រើសម្រាប់បញ្ជាវត្ថុនានា ឲ្យបណ្តែតឡើងលើអាកាស បើចង់រំកិលឲ្យទៅមុខក្រោយឆ្វេងស្តាំ ត្រូវបញ្ជាតាមរយៈចង្កឹះទិព្វ។
ALOHAMORA
មន្តទូទៅ៖ បើគ្មានសោរចាក់ គឺត្រូវវាយកម្ទេចមេសោរ តែក្នុងពិភពវេទមន្ត គ្រាន់តែសូត្រគាថានេះ អ្នកនឹងអាចបើកស្រាយសោរផ្សេងៗ ដែលបិទជាប់ដោយសារវេទមន្ត
EXPECTO PATRONUM
មន្តទូទៅ៖ ជាគាថាទុកសូត្រពេលមានការយាយីពីសំណាក់ពួកខ្មោចស្រូបព្រលឹង “Dementor” ។ បើចេះសូត្រត្រឹមត្រូវ រូបភាពនៃសិល្ប៍នឹងចេញជារាងសត្វទេព (Patronus) ផ្សេងៗដូចជា ក្តាន់ ត្រីបាឡែន សេះ ចចក តោ -ល- ហើយសត្វទេពទាំងនោះនឹងប្រែខ្លួនជាសីល្ប៍ាការពារអ្នក និងបណ្តេញពួកខ្មោចស្រូបព្រលឹងទាំងនោះ។
អ្នកដែលចំណាំប្រើ: Harry Potter, សាស្ត្រាចារ្យ Remus Lupin។
STUPEFY
អាគមការពារខ្លួន៖ នៅពេលដែលបាញ់ចំនរណាម្នាក់ គេនោះនឹងឃ្ទាតចេញ ហើយបាត់បង់ស្មារតី ហើយដើម្បីដោះអាគមនេះ ត្រូវសូត្រថា “Rennervate”
PETRIFICUS TOTALUS
អាគមការពារខ្លួន៖ នៅពេលដែលនរណាម្នាក់ត្រូវអាគមនេះ ខ្លួនរបស់គេនឹងរឹងជាប់ឆ្កឹងនឹងថ្កល់កម្រើកមិនបាន ប៉ុន្តែក៏មិនធ្វើឲ្យគ្រោះថ្នាក់ដល់ជីវិត ព្រោះអាចដកដង្ហើម និងមើលឃើញបានដដែល។ សុពលភាពអាគមនេះ ប្រៀបបាននឹងទឹកកក ដែលដំបូងគឺកករឹង តែក៏រលាយបន្តិចម្តងៗ នៅពេលក្រោយ
EXPELLIARMUS
អាគមការពារខ្លួន៖ បើអ្នកចង់បង្អាក់នរណាម្នាក់មិនឲ្យប្រើចង្កឹះទិព្វធ្វើសកម្មភាព អ្វីដែលត្រូវធ្វើគឺកុំឲ្យគេប្រើចង្កឹះនោះបាន ដោយការកម្ទេចចោល ឬទម្លាក់ចេញពីដៃ ហើយគាថានេះ នឹងឆ្លើយតបនូវអ្វីដែលអ្នកត្រូវការ។ ក្រៅពីអាចទម្លាក់អាវុធក្នុងដៃហើយ បើគាថានេះបាញ់តម្រង់ទៅមនុស្ស ក៏អាចធ្វើឲ្យគេរបួស និងឃ្ទាតចេញផងដែរ។
PROTEGO
គាថាការពារខ្លួន៖ នៅពេលដែលសត្រូវបាញ់សិល្ប៍មកយើង គាថានេះគឺដើម្បីសូត្រក្នុងការរងសីល្ប៍ទាំងនេះ ព្រោះនឹងបង្កើតខែលកំបាំងមើលមិនឃើញដើម្បីការពារយើងភ្លាមៗ ហើយបើសិនចង់បង្កើតខែលរនាំងនោះទុកប្រើរយៈពេលយូរ ត្រូវសូត្រថា “Protego Totalus” នោះវានឹងកើតជាខែលមើលមិនឃើញបាំងយើងពីការវាយប្រហារផ្សេងៗ។
IMPERIO
បណ្តាសារមិនអាចលើកលែង៖ មនុស្សឬសត្វដែលត្រូវអាគមនេះ នឹងមានអការៈរង្វេងរង្វាន់ ស្ងប់ស្វាត់និងស្ងៀម ហើយក៏នឹងធ្វើតាមអ្វីដែលម្ចាស់អាគមបញ្ជាទាំងអស់ បើទោះជាបញ្ជាឲ្យទៅស្លាប់ក៏ដោយ។
CRUCIO
បណ្តាសារមិនអាចលើកលែង៖ ប្រើសម្រាប់ដាក់ទារុណកម្មគូភាគី ដែលវានឹងធ្វើឲ្យចិត្តវិញ្ញាណឆ្កួតលីលា វេទនាក្នុងខ្លួន ប្រៀបដូចមានកាំបិតរាប់សិបដើមមកចាក់ចូលខ្លួនមិនចប់មិនហើយ។
AVADA KEDAVRA
បណ្តាសារមិនអាចលើកលែង៖ ជាគាថានៃវិជ្ជាងងឹត អ្នកដែលសូត្រវា គឺអាចបាញ់ចំភ្លាម សម្លាប់ម្ខាងទៀតបានភ្លែត ដោយការមិនធ្វើឲ្យប៉ះពាលរាងកាយខាងក្រៅទេ តែវិញ្ញាណឯក្នុង គឺខ្ទេចខ្ទី។ គាថាងងឹតនេះមានឥទ្ធិពលលើសលប់ដល់ថ្នាក់អាចបំបែលគាថារនាំងបានដោយងាយទៀតផង។
ឥឡូវស្គាល់គាថាពីស៊េរីរឿង Harry Potter ហើយ តើគាថាណាដែលអ្នកចូលចិត្តជាងគេ?
