ពិតជាមិនគួរឲ្យជឿថាតារាភាពយន្តប៉ូលីវូដរបស់ឥណ្ឌា ឈ្មោះលោក Sushant Singh Rajput ដែលអ្នកទាំងអស់គ្នាស្គាល់គាត់តាមរយៈភាពយន្តភាគ «ជីវិតស្ត្រីមេផ្ទះ/Pavitra Rishta» ដ៏វែងអន្លាយរហូតដល់ទៅ 1424 ភាគ ដែលសម្ដែងជាតួអង្គ Manav Deshmukh ត្រូវបានគេប្រទះឃើញដេកស្លាប់ដោយការចងកសម្លាប់ខ្លួនឯងនៅផ្ទះរបស់គាត់នៃទីក្រុងម៉ុមបៃ កាលពី ថ្ងៃទី14 ខែមិថុនា ថ្មីៗនេះ។ តារាសម្តែងវ័យ 34 ឆ្នាំ រូបនេះបានសម្រេចចិត្តធ្វើអត្តឃាតដោយសារតែជំងឺបាក់ទឹកចិត្ត (Depression) ។
ដោយឡែកការស្លាប់របស់លោក Sushant Singh Rajput បានធ្វើឲ្យមានការសោកសៅយ៉ាងខ្លាំងក្នុងប្រទេសឥណ្ឌា។ លើសពីនេះទៅទៀតមាន សិល្បករ និងបុគ្គលល្បីៗជាច្រើន បានបង្ហោះសារចូលរួមរំលែកទុក្ខនៅលើបណ្តាញសង្គមអុីនធើណេត សូម្បីតែនាយករដ្ឋមន្រ្តីឥណ្ឌាលោក Narenda Modi ក៏បានបង្ហោះសារចូលរួមរំលែកទុក្ខផងដែរ ។
