តោះផឹកកាហ្វេ គឺជាឃ្លាសាមញ្ញប្រចាំថ្ងៃមួយ ដែលមនុស្សម្នារក្នុងទីក្រុងភ្នំពេញបានស៊ាំជាមួយទៅហើយ។ មិនថាព្រឹក ថ្ងៃត្រង់ រសៀល ល្ងាច គឺហាងកាហ្វេនៅតែជាកន្លែងដែលពេញនិយមបំផុតសម្រាប់ការជួបជុំ ពិភាក្សាការងារ រហូតដល់អ្នកខ្លះ លែងចេះធ្វើការនៅកន្លែងធ្វើការ ហើយទាញតែ Laptop មកអង្គុយធ្វើការបណ្តើរ ទទួលទានកាហ្វេ និងអាហារសម្រន់បណ្តើរនៅតាមហាងកាហ្វេផ្សេងៗ ព្រោះថាទីក្រុងភ្នំពេញសព្វថ្ងៃនេះ បើនិយាយអំពីហាងកាហ្វេវិញ គឺថារាប់រយទៅហើយ។
បច្ចុប្បន្នហាងកាហ្វេ កំពុងវិវឌ្ឍន៍ខ្លួនយ៉ាងលឿន ដែលហាងថ្មីៗទើបតែបើកខ្លះ បង្កើតឲ្យមាននូវបរិយាកាសប្លែកៗ ដែលផ្តល់ជូនទៅកាន់អតិថិជន លើសពីសេវាកម្មកាហ្វេ។ ដូចការលើកយកមកង្ហាញជូនពេលនេះ គឺជាហាងកាហ្វេតូចល្មមមួយ ដែលមានភាពលេចធ្លោរ ខុសពីហាងទាំងអស់នៅក្នុងទីក្រុងភ្នំពេញ ដោយមានងារថាជា «ហាងកាហ្វេជាន់ទី២ ដំបូងគេបង្អស់នៅក្នុងទីក្រុងភ្នំពេញ» នោះគឺ កេណី ឬ K3Ney។
ទល់មុខជាមួយហ្នឹងសាកលវិទ្យាល័យភូមិន្ទវិចិត្រសិល្បៈ ឬជាទូទៅអ្នកផងតែងហៅថា សាលារចនា អ្នកបន្តដំណើរ តាមផ្លូវក្នុងមួយ ដែលមានសភាពងងឹត និងអាថ៌កំបាំងបន្តិច ប្រសិនបើមិនទាន់ហ៊ានដើរចូលទេ អ្នកអាចងើយទៅលើនឹងឃើញស្លាក LED ដែលគេដាក់ថា «កេណី» នោះអ្នករកឃើញផ្លូវចូលហើយ។ ដើរតែបន្តិចនៅខាងស្តាំដៃអ្នកនឹងឃើញច្រកឡើងទៅជាន់លើជាមួយនឹងពាក្យថា Follow the light ដែលអ្នកអាចបន្តឡើងទៅជាន់លើតាមពន្លឺនោះ មកដល់ជាន់ទី២ កាលបើបើកទ្វារចូលនោះ អ្នកបានមកដល់ កេណី ហើយ ដែលជាហាងកាហ្វេដែលរក្សាទុកនូវអត្តសញ្ញាណសំណង់ផ្ទះល្វែងជាន់លើ មានឥដ្ឋការ៉ូក្រហមស ជាមួយនឹងគំនូរសិល្បៈលើជញ្ជាំង ប្លែក ហើយហាងនេះមានយរយ៉ាងមុខដែលអ្នកអាចទទួលទាន កាហ្វេ និងអាហារដ៏ឈ្ងុយឆ្ងាញ់ បណ្តើរ គយគន់ទេសភាពតាមដងផ្លូវបណ្តើរ។
បើតាមរឿងរាងនៃការបើកហាងកាហ្វេមួយនេះ ម្ចាស់ហាងបានចារឹកលើជញ្ជាំងថា ពាក្យ «កេណី» គឺបានស្រង់យកចេញពីពាក្យថា «យក្សក្ខេណី» ដែលគ្រប់គ្នាសុទ្ធតែយល់ថាជាសភាវៈមានមាឌធំ កាចសាហាវ គេឯងកោតក្រែង តែគ្មាននរណាម្នាក់ធ្លាប់បានឃើញសភាវៈនេះ មានពិត ឬអត់ទេ ហើយម្ចាស់ហាងក៏យកពាក្យនេះយកមកដាក់ជាឈ្មោះរបស់ហាង ដោយហេតុថាកាហ្វេនៅក្នុងហាងនេះខ្លាំង ប្រៀបបានហ្នឹង យក្សក្ខេណី អ៊ីចឹង!។
រឿងញ៉ាំរឿងធំសុំណែនាំតែត្រឹមប៉ុណ្ណេះ ហើយតទៅទៀតប្រិយមិត្តអាចទៅទទួលយកបទពិសោធន៍ និងភ្លក្សរសជាតិ ដែលកេណី ផ្តល់ជូន ដោយខ្លួនឯងផ្ទាល់ណា៎!
កេណី បើកជារៀងរាល់ថ្ងៃ ចាប់ពីម៉ោង ៩ព្រឹក ដល់ម៉ោង ៩យប់
ផែនទីហាង៖
